“Ոսկե ծիրան” Երևանի 9-րդ միջազգային կինոփառատոնը բացված է

“Ոսկե ծիրան” Երևանի 9-րդ միջազգային կինոփառատոնի առաջին օրն սկսվեց մամլո ասուլիսներով: Օրակարգում “Հայկական համայնապատկեր” մրցութային ծրագրի ֆիլմերի մի մասն էր. լրագրողներին ներկայացվեցին փառատոնի ծրագրի հայկական վավերագրականներից ինը` «Հայկական հաց»-ը (ռեժ.` Արմեն Գասպարյան), «Իմ փոքրիկ իշխան»-ը (ռեժ.` Արմեն Ռոնով), «Արզուման»-ը (ռեժ.` Անետա Օհանջ), «Նոր Ջուղա. լինել…»-ը, (ռեժ.`Արսեն Գասպարյան), «Երկու ճանապարհ»-ը (ռեժ.` Վահե Յան), «Կոստան Զարյան. հայ գրականության միայնակ հոգին» (ռեժ.` Հայկ Կբեյան), «Արմինեն և Լեդի Մակբեթը» (ռեժ.` Միշա Ղազարյան), «Տղաներիս հետ միասին»-ը (ռեժ.` Տարոն Պետրոսյան), «Ինձ աշուղ են ասում»-ը (ռեժ.` Արթուր Խուդոյան): Ռեժիսորներն իրենք պատասխանեցին ֆիլմերի վերաբերյալ լրագրողական հարցերին:

Փառատոնային առաջին օրը կեսօրից հետո շարունակվեց “Ոսկե ծիրանի” ամենագեղեցիկ ավանդույթներից մեկով` Ծիրանօրհնեքի արարողությամբ, որը տեղի ունեցավ Երևանի Սբ.Զորավոր եկեղեցում: Յուրատեսակ տոնին մասնակցեցին ինչպես Հայաստանցի, այնպես էլ օտարազգի հյուրերը:

Իսկ արդեն երեկոյան կայացավ թերևս ամենակարևոր իրադարձությունը`բացման արարողությունը: “Մոսկվա” կինոթատրոնի բակում ընթացող “Կարմիր գորգի” երթին հաջորդեց բացման հանդիսությունը, որի շրջանակներում ոչ միայն հանդիսատեսին ներկայացվեցին փառատոնի մրցութային ֆիլմերը և ժյուրիի կազմը, այլև տեղի ունեցավ “Փարաջանովյան թալեր” երկու մրցանակների շնորհման արարողությունը փառատոնի` այս տարվա երկու պատվավոր հյուրերին. “Փարաջանովյան թալեր” շնորհվեց իսպանացի հռչակավոր ռեժիսոր Վիկտոր Էրիսեին: “Փարաջանովյան թալերը” շնորհվեց նաև վրաց անվանի ռեժիսոր Էլդար Շենգելայային: Մրցանակը հանձնեց փառատոնի արդեն բազմամյա բարեկամ և միշտ սպասված հյուր կինոռեժիսոր Ռոման Բալայանը:
Փառատոնի տնօերն Հարություն Խաչատրյանը և Փառատոնի գլխավոր հովանավոր “ՎիվաՍել-ՄՏՍ” ընկերության գլխավոր տնօերն Ռալֆ Յիրիկյանը հայտարարեցին “Ոսկե ծիրան” Երևանի 9-րդ միջազգային կինոփառատոնի մեկնարկը, որին հաջորդեց Համո Բեկնազարյանի “Շոր և Շորշոր” կատակերգության ցուցադրությունը: 1926թ. ստեղծված ֆիլմը հանդիսատեսին ներկայացվեց թարմ շնչով` Վահագն Հայրապետյանի և իր ջազ խմբի կենդանի երաժշտական ձևավորմամբ, ինչը, ի դեպ, մշակվել էր հատուկ այս արարողության համար:
Բացման հանդիսությունը վարեց ֆրանսահայ դերասան Ժիրայր Բաբազեանը: